خونة ......أجندات ......تمويل

أيوه خونه وأجندات وبياخدوا تمويل ,خونة لأنهم ثاروا على المناضل المجاهد حسني مبارك ,وأجندات لأن مبارك المناضل كان ضد التدخل الأجنبي في مصر لذلك الشباب بقى هما اللي بينفذوا الأجندات الاجنبية اللي غرضها تخريب مصر ,وطبعا بياخدوا تمويل لزوم فقع عينيهم وتشويهم من الضرب والسحل والتعذيب في السجون والمعتقلات والتشهير بيهم وبسمعتهم والخوض في أعراضهم والكلام ده يعني ,طبعا إنتوا عارفين إن الحاجات دي بتتكلف .
وطبعا للاسف نجح هؤلاء الخونه في خلع المجاهد حسني مبارك ومسك الحكم المجلس العسكري اللي يعتبر جزأ لا يتجزا من النظام السابق ,اللي كانوا ساكتين على الجرائم التي ا ُرتكبت في عهد المناضل المجاهد حسني مبارك ,ولكن علشان مانظلمهمش قولنا الله يكون في عونهم ,يعني الناس هتحارب ولا تشوف مين اللي سرق ومين اللي نهب ومين عذب ومين جاب مبيدات مسرطنة ,المهم بعد مامسك المجلس حسينا طبعا كلنا إنه مع الثورة قلبا وقالبا ,وطبعا المحاكمات العاجلة اللي حصلت لأفراد النظام السابق وظباط الداخليه المتهمين في قتل وتعذيب المصريين وغيرهم من الذين أفسدوا الحياة السياسية ونهبوا خيرات البلد , ولا ننسا أموالنا المنهوبة التي عادت إلينا من بنوك سويسرا وغيرها ,وأكيد ماننساش الموقف الجرئ والحاسم والقوي من المجلس العسكري في سرعة ضبط وإحضار ومعاقبة كل المتسببين في أحداث مسرح البالون والسفارة الإسرائيلية والعباسية وماسبيوا ومحمد محمود وأخرهم مجلس الوزراء .

وأخيرا حتى لا ننسى ما حققه هؤلاء الخونه من الشغب اللي بيعملوه في التحرير ,
1- تعيين نائب لرئيس الجمهورية
2- تنحى حسنى مبارك
3- استقالة أحمد شفيق
4- القبض على رموز النظام السابق
5- زياده أجور البعض ومنهم رجال الشرطة
6 - إلغاء المحاكمات العسكرية
7- تحديد موعد إنتخابات مجلسي الشعب والشورى
8 – تحديد موعد تسليم السلطة

أكيد العيال الممولين اللي في التحرير لم يقصدوا الضغط على الحكومة لتحقيق هذه المطالب لأنهم خونه ومخربين ومش في بالهم مصلحة البلد .

ملحوظة : أنا نزلت التحرير اليومين اللي فاتوا وفعلا اللي موجودين في التحرير مش هما ثوار 25 يناير والدليل إن مافيش ولا واحد فيهم عليه إستيكر أو بادج 25 يناير .